Y Gronfa Buddsoddi i Gymru’n cyhoeddi buddsoddiad mewn darparydd ynni adnewyddadwy yn Abertawe

English version of this content

Mae Banc Busnes Prydain wedi cyhoeddi ei ail gytundeb cyllid dyled o’r Gronfa Buddsoddi i Gymru £130m, gyda buddsoddiad o £100,000 o’r Gronfa Cyllid Dyled, trwy reolwr y gronfa, FW Capital.

Y buddsoddiad yn Economy Energy Group, sy’n ddarparydd ynni adnewyddadwy ym Mharc Menter Abertawe, yw’r ail gytundeb cyllid dyled i gael ei gyhoeddi ar ran y Gronfa Buddsoddi i Gymru, a hynny cwta ychydig wythnosau ar ôl y cyntaf.

Lansiodd Banc Busnes Prydain, a gynorthwyir gan y llywodraeth, y Gronfa Buddsoddi i Gymru ddiwedd Tachwedd 2023 er mwyn hybu’r cyflenwad o gyllid cyfnod cynnar sydd ar gael i fusnesau bach a chanolig eu maint ar draws Cymru. Bydd y Gronfa’n cynnig amrywiaeth o opsiynau cyllid masnachol gyda benthyciadau llai o rhwng £25,000 a £100,000, cyllid dyled rhwng £100,000 a £2 filiwn, a chyllid ecwiti o hyd at £5 miliwn.

Sefydlwyd Economy Energy Group yn 2014 gan y trydanwr profiadol Anthony Dixey i gyflawni gwaith trydan ar gyfer cwsmeriaid preswyl a masnachol. Ers hynny, mae’r busnes wedi arwain y ffordd yn y sector ynni adnewyddadwy, ac mae’n cynnig gwasanaethau fel prosiectau masnachol mawr i osod technoleg solar, a phwyntiau gwefru ar gyfer cerbydau trydan; darparu atebion ynni adnewyddadwy oddi ar y grid ar gyfer cwsmeriaid anghysbell, a sicrhau bod cartrefi cleientiaid yn integredig â’r technolegau clyfar diweddaraf ar gyfer y cartref.

Dros y deng mlynedd diwethaf, mae’r cwmni wedi gweld twf yn y galw ac yn ei sylfaen o gleientiaid. Mae ei drosiant wedi cynyddu’n gyson mewn blynyddoedd diweddar, o £380,000 yn 2022 i £620,000 yn 2023, a rhagwelir trosiant o £1.2m yn 2024 yn sgil y buddsoddiad yma.

Nod cymorth Banc Busnes Prydain sydd ar ffurf benthyciad o £100,000 yw hwyluso twf pellach, ac mae hyn wedi caniatáu i Economi Energy Group gyflogi pedwar aelod newydd o staff, gan fynd â’r cyfanswm i naw, gan ychwanegu at eu rhestr o drydanwyr, towyr a labrwyr, sy’n cynnwys dau brentis. Maen nhw wedi prynu wagen fforch godi, pedair fan newydd, wedi ailwampio’r swyddfa ac wedi gosod system TG gyflawn er mwyn helpu i reoli eu twf parhaus.

Mae’r cynlluniau ar gyfer y dyfodol uniongyrchol yn cynnwys ymgysylltu â’r holl ysgolion yn yr ardal leol sydd wedi cael grantiau i osod atebion ynni adnewyddadwy yn eu hadeiladau, gan gynnwys grantiau ar gyfer paneli solar a phwyntiau gwefru. Maen nhw’n gweithio gyda chwmnïau ECO4 (cynllun effeithlonrwydd ynni'r llywodraeth â’r nod o daclo tlodi tanwydd a helpu i leihau allyriannau carbon) hefyd er mwyn darparu ynni solar ar gyfer cartrefi sy’n rhedeg ar lo ac olew ar hyn o bryd. Yn ogystal, mae ganddynt nifer o brosiectau mawr cymhleth ar y gweill gydag RGM Vehicle Body Repairs, a’r cwmni rheoli gwastraff ac ailgylchu Gavin Griffiths Group, a sefydlwyd o dan y buddsoddiad newydd ac nad oedd modd ei hwyluso o’r blaen.